MPL Match fixing chungchang

Blog update a awm khat em avangin dah ve mai mai ang. Ka edit peih tawhlo Para ka then te pawh a felfai lo vek blog ah chuan. Ni mai mai teh se 🤣

 MPL-a match fixing buaina chungchang chu a alh chhuak ta a. Inkhel-in thuchhuah kan siam lai khan tam tak chuan kan awih phal lova, a then chuan MPL level hniam lutuk ah pawisa tam tham a leng lovang te kan ti hlawm a nih kha. Nimahsela, niminah MFA in thuchhuah siamin hremna a ti chhuak ta hluai mai a. Hremna pawh a na hlawm viau; club 3, staff 3 leh player 25 hrem niin, a ṭhen te phei chu damchhung atana hrem te an ni!

 Eng nge match fixing chu? Awlsam taka sawifiah thiam a har a, tam tak chuan in hre thiam tho a. A hrethiam lo tan a tawi zawngin kan tarlang hmasa ang. Team 2 an inkhel a, a inkhel ah khan chak zawk tur, chaklo zawk tur, goal chhuah tur, card hmu tur etc., kha tih fel sa vek niin. Chumi anga ti thei tur chuan mual chhûngah khan ṭan an la ta ṭhin a nih chu! Chutianga a ruaitu te duhdana an khelh phawt chuan pawisa an hlawh ta ṭeuh ṭeuh ṭhin a. Tun MPL season liam ta ah pawh khan a lawk deuh chin phei chuan 1Lakh te an hlawh niin sawi a ni. Hetianga inhnamhnawih club leh players te hi an lo awm nual a. 

A bul tum tu, engkim ruahmanna siam tu erawh an awm anih hmel a, hremna pawh a na bik deuh niin a lang! Nimahsela, hei hi hre reng ila, club ṭhenkhat an hrem tak te players zingah ti ve duhlo, in hnamhnawih duh hauhlo an awm nual thung. Engtin zel? 'Signal man' hi a awm ṭhin niin an sawi a. Ipte ah dan te, lukhum khum dan thlengin awmzia a nei a. Field chhunga players ten chu signal man awm dan chu thlir chungin an khel ṭhin niin sawi a ni! A chang phei chuan rawng(color) hmang ten 'signal' chu an in pe thin! Half time lai te hian phone spare lo nei tawk, lo dah thukru tawk te an awm niin sawi a ni. Chung ho chuan an 'boss' te nen inbia in 2nd half-a khelh dan tur te pawh an rel ṭhin a ni maithei! India ramah hian hetiang thil hi a tam em avangin an fimkhur viau ṭhin. 

Mizoram-a Cricket league MCL-ah pawh phone hi an ken luh a remlo va. Match fixing an hlauh vang a ni. Tin, Fantasy-ah (Dream11 etc) pawisa an hlawh nual theih avangin Mizorama Cricketer te pawh hian he'ng Fantasy hi an khelh a rem miahlo bawk! Pakhatna in nuai 3 chuang daih te an hlawh fo avangin a tak taka inkhel a ten Fantasy-a an sum hmuh theih beiseia a taka an khelh an hlauh vangin, an khelh hi khap sak an ni. Kan tarlan tawh angin players ṭhenkhat erawh an felfai hle. 

MFA hruaituten hetiang thil hi state dangah a thleng tawh ṭhin tih an hriat avangin an fimkhur a, players zawng zawng ko khawm in Chanmari YMA Hall-ah pawh a hremna nat tur zia te pawh an hrilh hre vek nghe nghe! Hetiang hre reng chunga ti lui te an nih hlawm avangin MFA hian a dimlo hle a, hremna an chungah a lek ta hmak mai. Hetianga sum rawn tawktarh tu te hi Organisation pakhat niin a lang! Nimahsela, an hnuaia thawk a, thurualpui erawh an ngah fu, Mizo leh hnamdang te pawh an ruai a. Hotel-ah te inhmukhawmin an hmalak dan tur an rel ṭhin niin hriat a ni! Rinhleh an nihna a rei tawh!? He match fixing/Corruption hi season dangah pawh a thleng tawh ṭhin niin an sawi a.

 Nimahsela, man fak an nei lova, thawm zawi te in a ral leh mai ṭhin. Tun season-ah pawh a tir aṭanga rinhlelh na a awm a awm a. Players te quality en te, an khelhna club leh league en pawha khelh dan pangngai lo lutuk a khel, a ṭhenah phei chuan off position ngawih ngawih a khel tlat te. Awmang lo lutuk a ball pass sual te, ball man ṭhelh thlengin a awm nuk mai a. Chik taka lo en ṭhin te chuan an hai lova, mak an ti ṭhin viau. Kan tarlan tawh angin chiang taka man fak an neih loh miau avangin thawm zawi deuhin a rukin an lo chhui char char a. 

Tun dinhmun hi kan thleng ta. Kan tarlan tawh angin sum hi a tam em em mai a. Heta in bat lut tawh te hi chu agent ang an ni ber. MPL an khel zo chiah a state danga tournament emaw League emaw an khelh dawnin a chah in an rawn chah a, an kalna tur Flight ticket thlengin an rawn tum nghal vek nia! ISL team te meuh pawhin an reserve team te tana an tih hleihtheihloh kha kan sawi mek te hi chuan an ti zar zar tlat nia! 

Tuna an hrem ṭhenkhat te phei hi chu state dang/ram dangah League/Tournament khel tûrin an lo thleng leh nual hman tawh. He'ng sum tam tham tak tawhtarh a ti kual ṭhin te hnuaia tlu lut tawh laklawh te chuan a hlawkna an tel nasa tawh bawk a, an in bat lut thuk tawh a, an kual an kual a ni ber. I-League club emaw ISL club emaw a lut awm tak tak, an theihna pawhin a tlin ve mai lo maw tih tur khawpa player ṭha ṭhenkhat te an awm a. Nimahsela, heti hian league te zawkah club langsar lo takah an kual an kual a, mi thuhnuaia awmin pawisa an hlawh nghek nghek ṭhin niin a lang. He'ng sum tawktarh tu ten club, staff te players te an thunun fuh tawh laklawh chu, an tikual thiam viau! Player ṭhenkhat midfielder ni char char ṭhin te kha a changin defender an nih tir thut a. Goal an chhuah leh nge nge ṭhin. Goal an chhuah pawha pawi ti anga lang miahlo te pawh hi ngaihtuah let hian an lo awm fo tlat! Langsar lutuk silo, mi te man thiam loh turin an squad hi an rotate 'kual' a, ṭhenkhat training naa khel ṭha tak, khelh huna hmun chang leh silo te an awm nuk fo reng a ni. 

Tin, langsar taka red card hmuh te kha a rem lova, a rukin an fimkhur thiam viau bawk niin a lang. MPL season liam ta khan direct red card pakhatmah a awm lo nghe nghe! A tawk tea foul dan te, tih sual palh dan te an lo thiam bel hman viau naa, a chik peih te chuan an lo hmuh hmaih hauh lo thung. A hlawk bawk aniang, IPhone chhuak thar te, Bike man to nalh tak tak nei thei mai te kha an awm leh nuk ṭhin a, an fimkhur tâwk thiamlo deuh te pawh aniang, a rûka lo thlir tu te mit a mim hmain an rinhlelh a ti zual ting mai a ni ber. 

 Hetianga inhnamhnawih ṭhenkhat te hi chuan an hmakhua an ngai ve viau bawk a. AIFF hian player status leh registration tihna ṭha tak mai, Centralised registration system(CRS) an nei a. State tin FA ten an hmang vek a. Chumi a inziah luh zel chu angaih avangin transfer chungchangah pawh a ṭangkai em em a. A tello chuan engmah a tih theih tawhloh! CRS kaltlanga thil tih a ngaih tlat avang chuan player ṭhenkhat inhnamhnawih te chuan a rang a rangin transfer te an lo buaipui ṭhin niin sawi a awm bawk. Tuna hrem tak te hi state dangah an khel thei ang em tih zawhna awm thei erawh sawi mai har tak a ni. Tournament eng emaw ah CRS(Online) kher lova an buatsaih lo awm ta se, in ven har tur tak a ni lawi a. Player pakhat hrem tawkte zing ami erawh chuan, hetiang thil hi engmah a hriatthiamloh thu a sawi ve tlat thung! Hei hi thil awm thei a ni ang em? A ni thei ve maithei, a insawithiam tumna pawh a ni maithei bawk. Kan sawi tawh angin Investor te hian MPL-a club 3/4 an rawn hmin takah chuan, an thuhnuaia an dah miau chuan player control an ngah dawn tih a chiang reng a.

 Season thara control leh tur hual lawk pawh an nei ang tih a rinthiam theih mai. Player ṭha tura an rin, skills ṭha bawk si te chu Rs 40,000 te an lo pe ve anih hmel a. He'ng player te hian an club khelh mekna investor te aṭanga khelh ṭhat man an dawng kha thil diklo ah an ngailo pawh a ni ve thei. An hriatloh miau chuan, an club sum finance tu te thil pek chu lak mai kha thil sual ni pawhin a lang lo. Hemi chungchâng hrefiah turin kum danga phai club-a lo khel kuala, hetiang pawisa vela inhnamhnawih tawh kan bia a, ani chuan a chunga kan tarlang tak ang thil khi a dik thu a sawi. Player ṭha an hmuhin khuareia an la control theih tura an ngaih chu bonus ang ten an pe ṭhin a, hual lawk nan sun hmangin thiam deuhin an lo vawm lawk ṭhin niin a sawi a. 

Tin, hetiang a inhnamhnawih te hi chu match day dawnah te hian players te leh staff te nen an inhmukhawm ngei ngei ṭhin bawk niin a sawi. Kan hriat angin Club 3 chu hrem an ni a. Club pakhat pawh a tirah chuan sawi kai deuh an ni a, nimahsela, anni hi inhnukdawk a, an tlanchhiatsan niin sawi an ni! A dik maithei, hetia an inhnukdawh hnu hian player release an nei nual! MPL khel club 8 aṭanga club 3 velah sum an invest a, an thuhnuaia an kun tir tlat chuan League result leh table a sawi danglam hneh dan tur chu kan hrethiam mai awm e! Pakhat lek kha chu awmzia a awm nep tih an hria a ni ngei ang, club dang pawh an lo hmin tlat! "Vawiin chu Aizawl FC kan tum dawn a, in focus a ṭul lo ania," ti ten coaching staff ten an naute an lo hrilh ṭhin ni awm tak a ni!

 Hrem belh an awm ang em? 

Tun dinhmunah players 25 an hrem a. Chiang taka an hriat mai loh, rinhlelh an la nei fur dawn tih chu a chiang reng a. Tin, hrem tak player ten midang an hrem ve siloh te an sawichhuah hun pawh a la awm maithei! He thil tenawm tak hi state dangah chuan a hluar in a nasa em em a, Meghalaya-ah pawh an lo buai nak nak fo tawh ṭhin. Page-a comment ṭhenkhatah pawh hetiang sawi tur hria an awm nuk kha. 

 MFA a huaisen! 

Kan tarlan angin State dangah chuan hre reng chungin an mit te an siai san a, an hre lo der te pawh aniang, hremna a awm meuhlo. MFA erawh an ri nghal ṭhak mai a, Mizoram football hmasawn zel nan te ṭhangthar lo awm tur te tana beiseina a awm zel nan leh hmasawnnana hetianga rorelna an siam hi an fakawm, an huaisen viau mai. Tuna an hrem tak te hi khuareiah Coaching lamah pawh kal zui dawn se, an nunhlui an hrelo thei dawn silo a, thil buaithlak a awm nual thei tlat. A sum hrawm hi a na viau mai a, match khata nuai dawn dawn te pakhat tana sên ṭhin anih nawk avangin, season liam taa an sum sen zat tur hi hriatthiam mai pawh harsa tak a ni. Mi ṭhenkhat rin dan phei chuan Nuai 100 chunglam fe a nih an ring nia!

Toying with Tourism department, Govt. of Mizoram.

Note: I chhiar hmain, he update hi thutak deuha chhiar loh tur. Nuih mai mai tur. Tin, pic ho khu click zel la a fiaha i en duh chuan. Mi pawi ka sawi anih chuan ngaihdam ka dil e.

Blog update a khat lutuk a, kumin ah ka la ti miahlo lehnghal a. Chuvangin blog update tur ka zawng a content ka nei thei si lo. Chu ka rilru hah ruk riau na chu tih tawpin a awm ta 😁

Eng dang a ni lo, Mizoram Tourism department in; Guitar perh tam ber World record siam an tumna chungchang ah logo design an huaihawt a. Zanin(21.10.2022) dar 6:45 bawr vel khan Logo design Lawmman dawngtu Pakhatna an rawn puang zar ta. Pakhatna hi 20,000 INR lawih a dawng dawn zui 🥱🥱

(Note: Design tu hi a hnua an thup leh tak si avangin ka tih lan sak ta lo)

Instagram ka lut chiah ka hmu chu, ka nuih kha a za lutuk tlat. A chhan engdang a ni lo; khawvel pum huap a record siam tur nisi logo-a Guitar lang kha a brand name a lang kuau a nih chu LOL! Kha Company khan an rawn sponsor pawh ni bawk silo khan a lang ve kuau lai kha 🤪😂

Mak ka ti lutuk a, tun hma atanga pawisawi website Lawrkhawm.com WhatsApp group-ah ka va sawi ta a. Sawi belh tur an lo hre hlawm ngei mai 😂 Kan thianpa pakhat *hmingthup chuan, "Chhui chiang rawh aw.. Chunglam ni lo chhunglam connection ṭha a pawimawh . 🤣," a rawn ti. Ka nuih kha a za ta viau mai a. An rawn chip zui ta zel sawi thui tur an ngah ta telh telh a. 

 A hnu deuhah chuan google thlalak an rawn dah a, logo ami ang pui pui an rawn dah chhuak ta sup sup mai. 

(Note: A hnuaia mi khu i click chuan image source a lo lang zel ang)

1. Logo-a Khawvel thlalak ang deuh hi kan thianpa pakhat chuan a rawn dah ta mai.

  2. Logo-a Guitar lem ang zet mai a rawn dah bawk Lol 

 3. Logo pian hmang, a ruangam din tu ber lah heta mi hi an rawn dah bawk.  

Kan zing ami lahin kha Guitar ang deuh kher a lo nei bawk 😂

A hit ka ti lutuk kha phone atangin ka collage ta mawp mawp a tihian ka siam chhuak a.

Group-ah bawk chuan ka va post leh ta a. Nimahsela, a hnu rei lo teah Logo an post chungchang kha Tourism dept in an lo delete ta vek mai a! FB ah ka va en leh, a lo bo bawk.

 Ka nuih kha a za angreng khawp mai a. Ka pic siam kha a lo viral thuai a, an hotuten an lo hmu ni ngei tur a ni.

Nimahsela, a hnu rei lutuk lo, zan dar 11 rik tep khan Twitter-ah logo chu a rawn lang leh ta tlat mai a. Group-ah bawk chuan kan va nui tlang leh.

Nimahsela, tun tum chu a design tu hming a bo ta tlat mai a, tin, Guitar brand lang kha an dah bo ta hmak mai a. Kan nuih kha a za telh telh a ni ber mai. 

(Design tu hming leh address a lang ta lova, Guitar brand name a bo ta 😁) 

 Engpawh nise, Tourism department emaw Sorkar emaw huat vanga ti ka(n) ni lova, public-a an dahchhuah tawh chu 'roast' a thiang e an tihna angah ngaiin kan chip zui ve mai a ni. 

He blog ka ziah dawn hian ka thiannu pakhat ka rawn a. Tihian (pic below) min chhang ta sia, ka rawn blog ta hluai a nih hi.

He event lo awm tur hi hlawhtling takin neih nise, Mizoram vul zel se tih hi ka duh dan a ni. Nimahsela, logo erawh ka beisei a pha lo tluan ta zak mai. Ka thianpa Baktea lah chuan PNG awmkhawm vawmbei te chu a thiam thu a lo ti ve sek bawk 🥱

Bonus pic: An hming ka thaichhe ve lo Public post a ni bawk a. 

Phewwww...What a night 👏👏😎

Ni hrilhhai - 18th June 2021

(Thlan kalpui hma in a tawp nan a taksa dai diai chu ka zu khawih leh hram kha a nia)

Lockdown avanga kan tukthuan ei hmanhmawh peihlo; zing dar 9 pelh a kan kil laiin - Ka Ni rawn kal in, "I Pa a damlo a, Damdawi inah an kalpui," tih thawm ka'n hre dawt kha zawng, chaw ei a tui zawm mawh khawp. Kha mi ni kha van kohna chhanga min liam san ni a lo ni ta.

Pa huaisen, zâm hmel pu ngailo, hmeltha leh palian, ngilneihna, zaidamna leh hmangaihna te hi a bik taka Pathian in a pek em ni tih ngai hial khawpa thuam a ni tlat. A nih bak bakin ka sawi em lovang chu maw. A ni tluka ngaihsan tur chuang hi ka neilo; discipline nei tha em em- engtik lai maha tlai ngailo, thil theihnghilh ngailo. A hmuna engkim dah a, a hun ah chat chat thil ti mi, mi in vawng fel, Pathian tih tlat a nihna kha a 'quality' a sang ka ti em em. 

Kha mi ni lungchhiatthlak zia leh runthlak zia te, a hrilhhaithlak zia hi sawifiah mai theih pawh a ni lo, a na vawng vawng anih hi maw. Thihna ah hian duhthlan tur tha zawk phei zawng a awm hauh lovang tih ka ring, a na em em vek ang tih pawh ka hrethiam mai. Nimahsela, a dam lai hmel hmu in, enkawl hman in, thuchah eng eng emaw tal te chu min han hrilh hman sela chu lung hi a dam vawng vawng tur hi a nia. Chutiang reng reng a ni silo. 

Patling an tap ngailo viau, an mittui far khat pawh hi na tak a ni an ti thin. Chuti anih chuan, a ruang chunga Patling kum 60 pel tawh si, a then putar tia sawi ngam aw rawl chhuaha an tap ka hriat khan mak hi ka va ti ngai em! A taka patling tap hi ka la hre ngai miahlo a, amak ngei mai. Mi min hmangaihna leh min ui puina ka chhiar seng lo.

Mamawh zawk te tan tia ram leh a sum leh pai a ui ngailo tih te a boral hnuah ka hre thar ve leh a, ka lawm lutuk hi ka lung a chhe em em mai nia. Duhamna in a tihbuai ve ngailoh a nihna khan a thinlungah Isua a dah lal hle tih hi ka ringhlel lo reng reng.

Chutiangin, kei a fapa eng ni bik miahlo min hmangaih zia hi ka hrechiang em em a, min duhsak zia hi ka hmu reng fo. Duhsak taka thil mi lei tum te pawh keima pualin ka la nei dawn khawp alawm🥰. A damchhung a reilo na a, a rei khawp ang - a chanchin kan sawi bang dawn tlat hleinem, a hringnun zinkawng tawite thawnthu a ziak mawi lutuk kha ka Pa mah nise ka va ngaisang tak em. RK Lianzuala, Upa K.L Biakchungnunga leh Pastor Lalhmingchhuanga Zongte te kha kum 60 tlin hmaa boral atan chuan ka ui vawng vawng. Chutiangin, ani pawh hi ka duh ai chuan a va kal hma em. Nimahsela, lawmna ho te anga lang min ti thlamuang tlat tu a awm, chu chu hei hi a ni - a damchhung zawng khan a thu awihin, a thinrimna tur leh a lungawihlohna tur engmah ka ti lui ngai lova, ka lakah a lawm thin a ni tih hriat aia nuam a awm chuang hleinem. Ka laka lungawilohna nei lovin min liam san ta vawng vawng kha tih tak takah chuan chhiat tawk mah ni ila min ti hlimtu a ni daih asin.

Kar hmasa khan a note bu ka en a, a phek tawp lamah, 'Nitin mahni inthunun' tih sermon tur a lo ziak chu niin, December ni 29 nikum a a ziah a ni. A thuziah ka chhiar a, thil ropui leh ril a ziak hran lo; Nitin mahni inthunun theih hi Pathian thu a ni mai tih kha a ziah tum chu a ni mai. Nimahsela, a nun pui tlat thil a nih avangin keimahah thu a sawi ring hle a. Mahni inthunun thei em em, ruihhlo, zuk leh hmuam in a tihbuai ngailoh, zing tho hmaa engkim a huna ti thin, ei leh in pawh insum thei em em a nihna khan ka thinlungah thu a va sawi ring em. Tun Sunday kal ta khan, Rev. RC-a Jongte titi na LIBERATION THEOLOGY chungchang ka ngaithla a, mi chanchhia leh vanduai, rethei te lam tang Pathian anih zia a sawifiah hle mai a, kei lungngai leh vanduai nia in hre deuh tlat lamah Pathian hi a tang tih ka hre thar leh a, a nuam ka ti viau mai. He thu ka ziah lai hian a thlan bulah khawhar takin ruah tla ser ser karah keimahin ka thu a, lung zawng a chhia in rilru a na thar duh mang e, mahse mittui zawng tla suh se, nakinah ka la tawk leh dawn alawm. 

Mi tamtakin sunna an sawi, an ziak, ka hmu, ka lawm vek. Chu'ng zingah chuan kan khuaa pa ropui ka tih leh ka ngaihsan Upa R.L Buatsaiha'n thlahna thu a ziah hi ka'n vawm bei ang e.

"Pu Awia, pa nun tlang leh mi biak nuam, kawng dung walk-a in-wish mai pawh kal paha min chhang ngai lova din chilh ṭhin, mi inngaitlawm leh zaidam, mi tin tana ṭhian duhawm leh zirtirtu ṭha, mi tam tak hnena thiamna leh finna petu, pa ngainatawm tak a ni. Mihring ze ṭha tinreng sawi ila, amahah hmuh tur a awm zel ang tih mai tur a ni.

Hetiang mi hawihhawm, "Lalpa chu ka hmaah ka awmtir fo va," ti ṭhin miin min her liamsan ta vung vung mai si a. A hmun ruak a zauvin a khawharthlak mang e.  

A thla muangin chawl mawlh teh se. Ziri te nufa ka tuarpui em em a ni."

Pu Buata hian dawt a sawi lo, a sawi lo tih hi ka chiang em em. Kha mi ni atang kha chuan thlanmual ka hmuh apiangin ka pa te veng anih hi ka ti ve thei ta. Ka thing phun ngei, Khuangthli hlim-ah tak ka pa chuan Thawhlehna ni nghakin a mutna min sawn san ta. Mi 'tak tak' thi chuan min nghawng riau mai a, miin ka hmel leh ka che zia ah hmu theilo mahse, chhungril erawh a rum a nih hi maw. Nimahsela, nakinah ropui takin kan la intawk leh ang, chu chu thlamuanna min pe tu a ni.

Ebenezer.

"I kissed him our last kiss, he smiled a bit. He swerved to his side, took a deep breath, and it's done. That's how the story ended,"

Says my Mom!

Breaks my heart. Ka mittui ka dang zo lo! Aw ka Nu aw ka nu!

— Muantea Chinzah (@MuanteaChinzah) June 19, 2021

Ka hmaah dawhkan i buatsaih thin - Rev Vanlalbela.

Nghakhlel taka ka lo thlir dauh dauh lehkhabu chu a ngaihnawm ka ti ngei mai. A chanchin tlangpui hi chu a thusawi ka ngaihthlak hnem tawh em avangin ka hre nual tawh. A chanchin hi hmanah RealLife Magazine(?) in an chhuah tawh a, a softcopy kha ka print out a ka chhiar nasa thin. A bo mai lohnan ka blog ah HETAH hian ka dah nghe nghe.

A aia chipchiar zawkin a ziak a, a ngaihnawm in a va hlu em.

Rambuai lai a a rammut dan chanchin atangin a tan a, CH Battalion Sipai chhuanawm zingah telin, Ramhnuai kohhran ah hial Upa a thlan a ni.

A chanchin a ngaihnawm ka tih leh min hneh ber lai chu, a tumruhna, a beih fan fan na leh Pathian a rin tlat na hi a ni.

Pawl 3 chiah pass in, a ngaihsan loh em em, a rammut laia a do thin, Vai ho tawng zirin thla 3 chhungin a thiam hman a. Pawl 3 chiah pass siin Pathian thu a zirchhuah dan chanchin hi a va pui em. G.Th, B.th, B.D a zir chhoh dan zawng zawng te, a kar-laka harsatna namenlo a tawh dan zawng zawng chhiar hian, thawnthu phuah thiam ten ngaihnawm thei ang ber tura an phuah te hi a ang ka ti hial a ni.

A tana tha te theihnghilh lova a chawimawi thiam em em te kha chhiar a nuam; Rev.Thangpuiliana, a rawngbawl ve theihnana a rawn ve fo thin pawh an thlalak dunna te a dah tel hial. Kumin March 20 khan Pastor Thangpuiliana a boral a, thlana tawngtaina hmang tu ngei kha Pu Bela hi a ni.

R.K Lianzuala khan, "Mizo zingah chuan Pawla ang teuh ber pawl a nih a rinawm hial a ni," a lo tih hial Pu Bela hi a nep lo hle. Hei hian a nihna a sawifiah teuh ber in ka ring. 

Hmuhsitna, hrehawmna leh tawrhna nasa tak ten a ngam zawh loh Zofaten Rev. Vanlalbela kan nei hi a lawmawm. A rin Pathian hi rin chakawm ngawih ngawih in a nun ah a lang fo mai, chu chu a zuar thiam em em bawk.

Sawi sen pawh a ni lo e, he lehkhabu hi ka keu nawn ka keu nawn tur lehkhabu a ni chiang mai. Chhiar ve theuh turin ka duhsak che u.