Vanzau, Chalfilh tlang lamtluang

Kan chhuak tur ☺

Hmanni lawk, Dec 29-30 khan Reiek tlang-ah riak in hun kan lo hmang tawh a, tun tum chu hmun hla zawk, Hmar Tlang dung hrut in, Khanpui khaw kiang maia awm, Chalfilh Tlang chhip sang lai ber Vanzau hmun kan han tlawh a, a hlimawm khawp mai. Aizawl atangin 100kms bawr vel niin, Darkar 3-4 vel tlan ani deuh ber mai. Reiek kan kal khan mi 7 kan kal a, khata kal 3(Fela, Albert, Sawmtea) ten min peih loh san ta si a, an aiah mi pathum dang an rawn tel thei hlauh a, Maruata, Hriata leh Machhana(an vai hian ka U te rual vek). Kan kal na Chalfilh leh Aizawl inkar ah hian khaw tam a awm lo; Aizawl-Tuirial-Zero Point-Sesawng-Mualmam-Turini-Khawruhlian-Hmunnghak - Khanpui chauh niin Sesawng atanga Khawruhlian inkar a hla deuh tih loh chu a bak chu in hnaih te te vek anni.



Tun tum kan zin tur chu ka phur lo hle mai, thianten min peihloh san nasa si a, a hla tham si a, a vawt em em an ti bawk nen, ka phur loh na chuan min ti peih lo em em. Mahse, Reiek kal te pawh kha dik tak chuan a tirah chuan a peihawmloh zia te, a hmun kan thlen hnua a nawm leh si zia te hriat chuan han thulh san chi ah ka ruat lova, phur lem lo mah ila nuam ka ti leh tho dawn tih chu ka in hre lawk reng mai.


Kan kal hma atang rengin Vanzau chanchin te an sawi te ka chhiar hlawm a, chu'ng zinga bengverh ta ber chu, "Vanzau ah hian Mipa Chi a nung thei lo a, hmeichhia an rai thei lo" an ti. An sawi zau zel naah phei chuan tun hmain he lai hmunah hian Khua a lo ding tawh thin a, mahse hmeichhia an rai thei tlat si lo a, an rauh san leh ta niin an sawi. Mipa chi a hut duh ti ten an lo sawi fo tawh thin a ni awm e.

Chalfilh Tlang hi Mizoram-a tlang san lama Pasarihna hauh tu niin, 1866mtr a sang a ni. Kan khaw bul mai, Hrangturzo ai khian 12 metres vel lekin a insan hleih a ni awm e. He tlang bul bawr vel ah hian khaw hran hran in hnaih te te a tam hle bawk.

Ni 10 zing dar 8 ah chuan kan chhuak tan ta. Zemabawk Tawngtai na hmun kan thlenin kan Bike ken pakhat Clutch Cable thlak a ngai a, a lo chat lek lek chu niin! Kan thlak fel a, kan tlanchhuah leh meuh chuan Dar 9:30 a ri thuak ta mai. Kan tlan chho zel a, Tuirial kawng pawh a lo la chhe nak nak khawp mai. Seling kan thleng chho a, Dar 10 a pel der mai! Kan ril lah chu a tam tawh ngang bawk nen, a chhak lawk a khaw awm(Sesawng) 4 kms vel leka hla ah chuan Biaka thianpa Faka te ina kan chaw pai te ei zai kan rel ta a.

 Kan han thleng chho chu, an dawhkan ah kan chaw pai te kan ei nghal mawp mawp a, an chhungkua an va fel tak em! Biaka bak an hmelhriat lo na chungin an unau te ang maia rei lo te chhung pawh min lo lawm thiam kha a hlu in a Mizo hle mai. Sesawng kan pel chu Kuhva kung ka hmu chho ta nawk nawk a, ka rilru te te chuan Hmar Tlangdung chu Khawchhak Tlangdung ang chuan a vawt ve lo tih chu a chiang e ka ti rilru chho noh noh a.

Kan mamawh tui kan chawi

Kan tlan leh nal nal a, Zing dar 8 a chhuak si kha chawlh neuh neuh kan nei hnem bawk nen kan muang angreng hle. Turini lei kan kan a, Hmar Tlangdung tak tak kan zawh tan ta, ka tan chuan a vawikhat na vek niin HmarTlang dung ka rap ve ta zan mai. Chalfilh Group YMA kan thleng chu a ni der a, Khawruhlian kan thlen chhoh meuh kha chuan Dar 12 chu a ri der tawh nia! Mamawh te leiin kan tui ken na tur te kan hawh a, Machhana thiante a unau te tam na a ni bawk nen, kan han ri hluai mai. Zana kan hem tur Ar 3.7Kgs leiin Rs 660 in min pe :)

Tlang chhip atanga a lan dan

 Hmanhmawh taka Khanpui pan leh in, Vanzau-a Sorkar Building enkawltu Pu Vala hnenah Machhana kalin, Bucket te a han hawh a. Tichuan, Vanzau chu kan kal thei a ni ta reng mai. Kei leh Arina leh Machhana te chu Pehlawn ah kal in, kan eirawngbawl na tur Bel  leh Guitar la turin kan phei tlang a. Pehlawn hi Machhana te khua a nia kan va zui ve kha a nia.

Puanin kaih mek :D

 Khanpui atanga 6kms lek niin kawng a tha em em bawk nen minute rei lo teah kan va thleng nghal mai a. Kan lak fel hnuin Vanzau lam panin kan tlan let leh nal nal a. Kan han thlen khan kan thianten Thing an lo fawm nak nak tawh a. Sana ka en a Dar 3:01 chiah chiah a lo ni der mai. Darkar 3-4 tlan an tih fo thin chu keini chuan Darkar 7 zet kan tlan anih ber chu.

Eirawngbawl e :D

Chaw ei tur :)

Changel hnah chungah Buhchangrum leh Sa :D

Thing te fawmin, Puanin kan han kaih fel chu eirawngbawl alo hun ta der mai. Ar te kan talh a, a vun lipin kalkawnga Ser Tui kan lei hmangin kan chiah nghal a. Dal leh Sangha Tin chhum pawlh leh Artui kan ringawt hmeh pawhin a lo puar theih hle. Chaw te kan eikham hnuah Zana Meipui kan chheh na tur lamah thing kan dah a, mei kan nun chho tan ta. A vawt tia an lo sawi thin chu a dik a, hmun dang ai chuan a vawt deuh! Mahse, ka rilru te te chuan kan khua ai pawn a vawt lo deuh chu anih hi ka ti rilru noh noh bawk.

Chaw ei dawn :)

Dar 8 bawr vel chuan Ar kan hem tan a, Dar 9 vel a rik chuan Machhana nau Mama leh a thiante 3 Pehlawn atangin an rawn kal ve a, Scooty Select-II ang chi ngei mai kha siam danglamin mi pathum thut theihin an siam a, chumi chuan an rawn thleng zak mai.

Meichher nen ngat ;-)

An rawn thleng chiah chu kan zai tan chu ani mai a. A puak tha thin khawp mai. Dar 10:30 vel chuan kan Ar hem chu a hmin der mai. Kan han thet darh a, kan ei a, Reiek a kan hem ai a hmin chiang zawk a, a hang tui tak zet! Machhana nau te hian Meichher rawng kengin Meichher ka humloh na hi kum 20 dawn a tling tawh chiang khawp mai :) Ka hum ve leh ngei kha ;-)

A mawi em a tlan chunga ka lak

Ar te kan ei fel hnu chuan kan zai leh a, dar 11 velah kan mikhual te chuan min haw san ve ta. Kan thianho 7 chuan kan awm a, kan lam a Guitar nen kan ri ve laih laih mai. Arina Bike chahbi thloh kan zawn te kha pui ve tak a ni. Vanzau rama Thlasik laia zan laia Parade hmasa ber kan ni mai awm asin :D Mut kan han tum chu kan thei mai lo tlang ani ang. Mut hmunah kan tawng ang luai luai a haha! Kei chu zing taka thawh a, Tower atanga khaw thlir duh ka nih avangin ka muhil zui a, zing dar 6 rik hmain ka tho hluai a, Reiek ang lo takin Dai a awm miah lo! Vawh erawh a vawt kher mai. Chhumin Ni a hliah avangin Ni a la lang lova, mei te nunin Thingpui Sen ka chhuang nghal a,  a tui duh khawp mai. Kan kal na hmasa Reiek ah tui kan nei mang lo, hetah chuan Ruahtui khawl na Tanky ah duhthusama tam a awm a, Toilet lah 8 ngawt ka hmu bawk.

Chalfilh tui ringin Khanpui ho an hnianghnar asin!

HorseFie e :D

Zing dar 10 ah chaw te kan ei fel hnuin haw zai kan rel a, kan insiam ta, kan zingah peih lo em em lah an awm nuk bawk. Kan tlanchhuak a, Vanzau atangin Khanpui khua chu minute 27 vel kan tlan! Pehlawn ah te thingpui te kan va in leh bawk a, kan hmanhmawh lo em em mai! Chawhma Dar 11:07 a chhuak si khan a thlang lawka khua, Khawruhlian ah Dar 2:15 ah pawh kan la awm vang mai. Kan hmanhmawh lo a ni ber mai. Muangchang a haw in khaw tin deuh thaw ah kan ding a, kan inphih harh a, kan muang hle. Kal lama kan chawlhna hmun Sesawng-a Faka te Inah bawk chawlin Thingpui tui tak min lo lum a, a lawmawm teh e! Kan In kan thlen kha chuan Dar 8 a ni der mai. Zing dar 11:-7 a chhuak si kha kan thleng har nek ;-)

Tin, zanah Chingpirinu hram dut dut mai :) Pahnih chu an awm chiang khawp mai kan riahna bulah khan. Vanzau-ah chuan Mipa Chi a nung reng em tih chu kan test ta lo mai ;-)

Vanzau

Vanzau 2

Vanzau 3

Vanzau 4