Mi Sáwm(10)

Thlala tu ah ka tang lol

Kumtin a kan tih thin angin, thian hovin January Ni 12 zan riakin, Darlung kai Tlawng  lui ah kan va riak a. He hmun hi vawi 3 ka kal na niin, YMA Blanket su in vawi 2 kan lo kal tawh na a ni a. A hmun nawm zia leh rem zia te chu kan hriat lawk sa vek anih avangin kan phur tlang hle. Nikum January ni 10 zan riakin Vanzau ah kan han kal tawh a. 2016 December Ni 29 zan riakin Reiek tlang chhip ah kan riak tawh bawk a. Nikum December 27 zan riakin Mapuia te huan, Khamrang ah kan riak tawh bawk a. Vawi khat mah inchhir ka la nei lo.

Ka view nawm zia khi :p

Tum dang ang bawkin a kal dawn boruak hi a va ninawm in a va peihawm loh thei tak! Kal te hi kan vaiin Sawm(10) kan ni a, Kei, Biaka, Mama, Arina, Ricky, Maruata, Rovi leh a pasal Rintea, Loncy leh Mawia te kan ni a. Tum dang ai chuan kal thei pawh kan tam ta deuh. Khi'ng zingah khian Outing kan neih vawi 4 a tel kim te chu kei leh Ricky te chiah kan ni, kan hman fal bik em ni? lolz..

Tv Senior Pu Ricky-a 

January ni 12 dar 1 a kal hman tura thu thlung kha kan nia. An sawi dan takin; thil tih ho nikhua hi chuan Tlai pawl te hi awm ve a nia, IST(Indian Stupid time) kan hmang miau a, Dar 1:45 PM ah kan chhuak fel thei hram! A huho vin kan kal theilo lehngal a. Rintea a office a ban hma theih loh avangin, Arina'n a lo nghak a. Keini kan tlan fe hnuah an rawn kal ve chauh a, Dar 4 bawr velah an rawn chhuak anih hmel.

A kuang te hi a zau a nia.

Ngaizel ah kan ding a, Biaka leh Maruata te Bike la leh Post office a kal an ngaih lawk avangin tlemin nghah an ngai a. Mahse lo nghah hmasak ai chuan tiin kan tlan leh a(a hmun va thlen vat a Thing fawm vat kan rilruk a). Tluang taka kan tlan hnuin, Aibawk peng kan thleng ta a. Ka chawlh tawh thin na Hotel ah kan thu a, ka thiante chuan Chow te eiin an in hnawh puar te te a, kei erawh kal hmaa chaw ka ei nual avangin ka ei ve ta lem lo. Hotel ah chuan thiante chu kan han nghak leh bawk a, 30 mins vel lai kan chawlh hnu chuan khaw thimin min nan mai hlauvin kal zai kan rel leh ta zawk a. Kum danga Blanket su a kan kal lai kha chuan kawng chhe tak kha a ni lova, tun tum kan kal chu a dám in a nal a awm zeuh zeuh a. Mahni theuh a Lirthei keng kan ni bawk a, kan kal beuh beuh a. Kawng lakah kawng a chhe bawk nen kan thil phurh kan han tawn tha leh thul! A nuam dangdai ve a nia aw!

Kan tent riang te

A hmun kan thleng thla ta. Mahse!!!!! Kum danga kan beisei ang a lo ni ta hauhlo, a hmun a Balu te la thin ho chuan, "In tlan tlang thei tawh lovang kumdanga kawng awmna thin kha, nikum Tuilian khan a ti chhe vek a, a in zawm vek a, a mar pat tawh mai" tiin min hrilh a. Kan lirthei te chu kan hnutchhiah a, kan bungrua kan la thla a, kan riahna tur hmun pan tumin kan in siam fel ta. Tui dai lo hram hram turin kawng kan zawng a, a chhak tlang zai zai chu kan zawh ta zel a ni. Tui dai ngei ngei lai a awm a, ka  han dai chu mak tak maiin a vawt hauh lo mai. Rilru te te chuan khaw vawt tak ka beisei ang chu anih loh hi mawle ka ti phei neuh neuh a.

Tent kaih mek

Thing muh tur an pu hahahahaa

Kan riahna tur hmun 'Spot' kan va thleng a, Sana ka en a, Tlai dar 4:51 alo ni ta der mai. Darkar 4 dawn kan tlan anih pek chu! Kan ding ngun em bawk a ni.
Kan bungrua te dah felin, thlasik anih avangin khua a thim hma em a. Eirawng bawl na tur thing leh zana kan bonfire na tur thing tam thawkhat tak lak angai a. Keiin Mei ka nun a eirawng bawl ka tan nghal mawp mawp a, ka kal rual pui; Mama, Ricky  Loncy leh Mawia te chuan thing an fawm char char a. Minute 20 vel a liam chuan khua a thim der nia! 5:30 bawr velah Biaka leh Maruata te lo thleng ve lehin, khua a thim tawh a, kawng an rawn zawh 'risk' nasa khawp mai. An ni chuan rem lo deuh deuh kawng an rawn zawh bik a ni awm e 😂 Dar 7 pelh hret ah Arina, Rovi leh Rintea te an rawn thleng a. Khua a thim tawh bawk nen, kei leh Biaka ten kan va lam a. 7:30 velah chuan kan kim thei hram tihna anih chu.

Natural oven in the making 😊😍

Eirawng kan bawl fel tawh a, mut na tur Puan In(Tent) kan kaih tan a. Tent hi 4 kan keng a, kan in daih mawi tawk khawp mai. He lai hmun hi miin thing an lakna hmun anih vang te pawh ni hmiang; Riah-buk an sual thin na tha tak tak a tam fu! Tent keng miahlo mah ila kan mu kim thap thei ang chu.

Tichuan le, Dar 8 a pel ta, ril a tam ta raih mai. Kan chawhmeh ken Dal leh Sangha Tin bur 2 kan chhum pawlh chu kan thianpa Mawia'n an khak baw mai anih chu! A tui zawng zawng a baw fai vek a. Tui leih belhin kan han chhuang sa leh te te a  Ka rilru te te chuan, "Tun ah chuan kan thinrim tung na a, naktuk velah chuan sawi nuam kan tih leh em em tur anih hi" ka ti a. Hei tunah ka type lai pawh hian ka nuih a ti za  A mah a inthiam lo sia, a nuihzatthlak duh ta khawp mai tun hnu hi chuan..

Changel ah ngat ;)

Changel la ve nasa.

Dar 9 alo ri a, chaw ei kan buatsaih tan ta. Mizo Pa style ngeiin Changel hnah kan la a, chutah chuan Chaw leh Chawhmeh kan dah tlawrh mai a, Chi nen, Artui leh Zawngtah nen(Rovi'n a rawn keng a) kan han ei chu(h) a tui duh mep mep teh e!

Thuk siam chawp. Sangha Tin kan

Kan ei zo chu kan Arsa hem chu kan vil tan a, a then Ukulele nen an zai a, meipui kan chhep bawk a. A nuam khawp mai. Ni danga kan tih dan ang lo deuhin Ar kan hem na chu Natural Oven an tih ang chiin, lei kan lai khuar vak a, chutah chuan Meiling kan dah ta vak a, chumi chung ah chuan Ar kan dah leh a. A chhin nan Changel hnah kan hmang leh ta a. Dar 10 chho vel ah chuan zai pawh a tui ta khawp mai!  Dar 11 a pelh chuan, Arsa chu kan han thet a, beisei a pha ta lo!!! Kan Ar lei kha a lian em a, Rs 750 man ania, a chhung a hmin tel ta tlat lo. A pawn hmin chin erawh a tui vawng vawng! 3Kgs vel lek chu nise a hmin vekin kan ring.

Disposable cup aiah Mauthei

Kan ei thei ta lo chu paih ka ui a, Cooker ah chuan ka dah tha a, a tuk zinga Buhchiar tur atan ka khek a, Cooker kan ken hi 4 litres dawng vel anih ka ring a, chumi khat tan chu Arsa chu ka dah tha ta a. Kan han zai ho leh te te a, a nuam dangdai thin a nia!

Dar 12 a pelh chuan ka kawng a kham bawk nen keichu ka mu ta a. Biaka leh Mawia a sir berah a fal deuhin an mu a. Mama, Loncy leh Ricky te kan ding lamah an mu a. Kei leh Maruata kan mu dun a, Rovi, Rintea leh Arina te kan vei lamah an mu a. Ka muhil nghal mai. Mahse, ka mutpui tur a rawn lut ta, minute 15 hnu vel atang chuan mi kai tho ta chhen mai a, min kaihthawh hmasak ber chuan, "Muante, a vawt i ti em" tih deuh tawp a sawi a. Min kaihthawh nan chuan a ho bawk sia aw ka ti rilru a. Minute 10 dan velah mi kaitho ta chhen a vawi 4 na velah chuan ka ning lutuk khan, "Mu hle hle teh ninawm" ka ti vel ta bawrh bawrh a. Vawi 6 na velah erawh ka nuih a za tan a, a chhan chu a tuk velah chuan sawi tur ti tam tur ani tih ka hrechhuak a. A hlimawm dangdai thin a nia.

Natural oven-ah Ar kan hem

Rintea leh Arina rawn mu tur boruak vel ber kha ka nuih a za a ni. Rintea nupui Rovi a muhil tawh si, Rintea te thawm an rawn dim tawh lo nasa mai. Rovi thinrim lutuk a phun ta. Rintea leh Arina ten tihluih nuam an ti si. Rintea'n, "Penglengpungi ni rawh" a ti. Rovi lah duai lo, "Penglengpungi ka ni bawk lo" ting mangkheng a a sawi kha chu ka nuih a va han ti za teh lul! Ka dir char char  Rovi thinrim telh telh, Arina'n tihluih nan ring tak maiin, "Khawnge la Lighter kha  a awm" an ti kha chu tih ngaihna a hre ta bik lo, amah Rovi khan nui chungin, "ka thinrim nuih tawh ania" an ti vel kha chu a pui e. Ka mut pui pa a rawn khak te kha pui tak a ni, khak awm reng kha a ni bawk a, a bengchheng em a tin  ni. Chutah threnawm Pa a chhuak a chhuak lawk duh si, tent kawngkhar a hmu theilo hawn sak turin a au ta ruah ruah mai kha a nuam dangdai ve a nia.

Chu'ng zawng zawng a zawh meuh chuan dar 3 a pel ta der mai a. Kan mu tha ta a, kei ka muhil tlang nghal a. Zingkar a lo ni a, Dar 6 vel chiah chiah alo ni. A vawt hran lo bawk a, ka tho a, Loncy leh Mawia te nen kan tho va, Mawia chu 6:20 velah a haw ta a thil tih tur a neih avangin. Keiin ka thingpui ken(Zo Thingpui ngat) chu ka chhuang a, a tui asin aw!

Eirawng bawl ho :

A vawt miah lo, zingkar ah pawh an inbual.

Loncy nen Nghakuai keng chhuakin Sangha man kan han tum chu, kan hlawhchham chiang e. A hmun a laili em a, miin an lo man nasa tawh ani ngei ang. Te reuh te te bak hmuh tur an awm lo! Kan hlawhchham chiang hle. Kan haw leh a, dar 8 vel a rik chuan rawngbawl kan han tum chu, Cooker a Arsa kan dah kha a lo zo deuh vek chu niin! Arina leh Rintea ten an lo ei deuh vek chu niin Kan chawhmeh tur a zo titih ta. Tih ngaihna dang awm hek suh; Buh nen kan Phit pawlh tawp mai a, Ramhnuai Biryani a ni hawt e. Chawhmeh ber awm ta lo chu, Aibawk pengah ei mai ang u an tia. Mahse Sangha tin bur 2 la awm chu Tomato 4 nen kan kang a, Buhfai tlem la awm nen chuan kan siam lui ta hram a. Zan a kan ei ai chuan kan ei tui zawk, a chhan chu a hang zawk fe a tin ni 

Changel ah kan dah khawm a kan han ei chu a tui biah biah teh e. Kan load hnem tlang asin aw! Chaw kan ei zo chu, titi pahin Thingpui kan In a, kan in seng fel meuh chuan 11:30 a lo ri tep ta  mai. Kan lirthei dah na panin kan kal a. Haw kawng ah chuan Tui kam vela Tuipuisuthlah in zar kawi duai mai chu ka hmu phei a. Ka rilru ah thu a sawi thui nghal hle a ni. Nikum tui let ka ngaihtuah let a, a chim chin kha a hriat vek a, Tuipuisuthlah(Willow) te erawh Tuilian khan a la ve reng reng lova, Tui luan zawng khan an hawi vek thung a. Bible a Tuipuisuthlah inziak ka rilru ah lo lang in, He'ng Tuipuisuthlah ang tur hi ka va ni em, thlemna hian min nuai mahse min la tur a ni ngai lovang ka ti phei nuah nuah a. 11:35 velah kan va thleng a. Mi pahnih hian Bung tlan Sava chu Airgun nen an lo veh pek a, 20 vel an kah thlak tawh thu an sawi a. Bâwng Nu leh Pa, sen leh eng mawi em em an kapthla nal nal hmuh kha a hrehawm in pawi kan ti tlang. Mahse, an chawhmeh tur ania, a tam tham chuan a tui viau chuan ka ring tho mai. Dar 11:53 vel ah kan chhuak a. Kan in zui haw ta vek a. Tluang taka tlan zelin tluang takin dar 3 velah In kan thleng ta a ni.

Tuipuisuthlah(Willow Tree) #SaturdayMotivation. Tui kam a thing saw Tuipuisuthlah, tukin zinga ka lak a ni. Bible-ah he thing hming hi vawi tam a lang a, Israel fate paw'n an tingtang an bang anih kha. He'ng thing hi an mak em em a, eng anga tuilian pawh hian a la ve ngai lo a, a zung kar phawng khawp hian tui hi a lian ngailo tluk ani. Nikum tuilian pawh khan khi a la ve theilo! An hawi zawng erawh tui luan zawng vek ani thung. Ringtu te chu Tuipuisuthlah ang a nghet em em tur hi kan lo ni! Kan hmaah eng anga thlemna na pawhin min chhem hawi sawk sawk mah se, kan phawng tur a ni ngai lo. Nghet takin chhel takin kan ding fo tur a ni. Sam 137:1-3 Babulon lui kamahte, Chutah kan thu a, a ni, kan tap thin, Zion kan ngaihtuahin. Lui laia tuipuisuthlahahte chuan Kan tingtangte chu kan bâng thin a. "Zion hla pakhat min saksak rawh u," tiin, Chutah chuan sala min hruaituten hla saah min ngen a, Min tiretheituten hlimah min ngen bawk si thin. #BeLikeTheWillowTree_Baby 😍

A post shared by An sawi Thingtlang Pa 😌 (@muantea_chinzah) on Jan 13, 2018 at 3:20am PST

Camping/Outing/Hiking hi a nin theih loh a, nun a ti hlim a. Hringnun chapter phek a ti tam ve a, ka hlimpui khawp thin mai. A aia nuam zawk kal leh na tur beisei chungin tun atan chuan duhtawk phawt ang. Cheers ^_^