Ka Nu

Kum khat hnu ah Blog update ve hrim hrim teh ang

Ka nun ka chhuikir a, pawi ka tih vawng vawng, ka inchhir em em te nei ve fo mah ila, tlu hlen lova tho leh thei dinhmun a ka din theih na atana ka sên têt ata min dawm kâng a, hmangaih a min mi châwikâng tu ka Nù hi ka va ngaisang tak em!

Chhungkaw tam tak ka thlir a, neih-nun lamah te, In leh rosum lamah te ngei pawh kan phakloh te an awm tam; mahse chu chu a pawimawh ber a ni lo tih ka man fiah nana Kristian Chhungkua min dinpui tu Ka Nu hi kumkhua atan ka ngaihsan ber a va ni chiang em!

Hausak hi sual a ni lo a, mi neinung ni thei nih hi Pathian malsawmna duhawm ani ngei ang tih chu ka chiang. Chu aia pawimawh hmasa zawk; Chhungkaw In-lungrual, in hmangaih a in dawm kang thei chhungkua din a pawimawh hmasak zawk zia hrechiang a, kan chhungkua a chu 'Chi' duhawm tak kui tiak a, thehdarh tu Ka Nù chungah hian lawmthu sawi hi ka va bà nasa tak em!

Nula Tlangval kan lo nih tak hnu a, Hmel ringawt a pawimawh ber bik loh zia kan hriat chian nana min zilh fo thin te kha; kan tleirawl tirh kha chuan kan lo ngaithla liam fo. Mahse, tun ah chuan kan lo upa ta a. Hmeichhe hmeltha nazawng, nalh ringawt an 'sexy' ber bik loh zia hi ka va man chiang ta em aw! Chhungkaw dik tak ka dinpui ve theih tur zawk hi a lo 'sexy' ber mai tih ka hriatchian phah a. A taka lan tir a, nunpui fo thin tu Ka Nù hi ka va ngaisang tak em!

Naupang hawihhawmlo leh chengvawng lo tak tak hi ka va hmu hnem em! Chutiang kan nih ve loh nana Ka Pa nen an inneih hnu lawk atanga a hna duhawm tak kalsana a fa te tana a inpumpek na ka ngaihtuah hian ka lawm em a ni. Mi ang pha lo mah ila, a hawihhawm lo pawl a kan tang ngai lo hi ka va lawm hnuhnawh em. "Hei hi hre reng ula; In Nu hi ka mawl ve hle pawh a ni thei. Mahse, in naupan lai atang reng a, enkawl a tih tak zet a, a awp a awp tu, khawi ah mah kalsan ngai lo tu che u ka ni" tia kan chaw ei laia a sawi khan, ka thinlung zawng zawng hi a keh ral vek a. Ka tah kha a chhuak em em a, khatih lai khan keimah chuan awm ila ka mittui te zawng a tla ve ngei  ang. Chutiang taka Nu in pe  kan nei  hi khawvela mi vannei ber unau kan va ni tak em aw!

Thil engkim ka tih dawn a, ka bula awm lo chung pawha tawngtai na nena min kawl thlap tu Nu ka nei hi ka tan chuan Rangkachak a va ni tak em!

Hringnun kawng ka pal sual loh nan a min zilh a, Pathian thu min fah a, min chhiar pui a, min ziah sak a, min vawn tir thlap thlap thin tu Ka Nu hi ka va ngaisang em!

Ruihhlo bawiha kan tan loh nana zirtir na tha tak kan dawng fo te, a hunlai a kan lo ngaihsak lemloh kha tunah chuan a takin rah tha kan hmu a. Tumah buaipui ngaia kan awm lo hi ka lawm a. Mi in, Zu in hi sual lo  nia an sawi an sawi pawh a. 'Zu in hi sual a ni lo mahna, mahse Zu inloh hi a sual lo hlei hlei' tia sawi thei tur khawpa kan thinlung a kan vawn nana min zirtir a, tawngtai na nen a min hlan thlap tu Ka Nu hi ka va ngaisang tak em!

Hmangaih tawp lova min chelh a, engkim min thlithlai sak tu, Nu ka nei bik hi mi vannei chungchuang ka va ni tak em. An tan tih let theih ka va nei tlem tak em. Mahse, nitin mai Ka Nu leh Pa hriselna Pathian kuta ngaihngam taka ka kawl tir na hian min ti thlamuang ve em em a ni.

Ka sawi seng lo, ka sawifiah zo lo. Ka tawng thiam in a daih seng lo. Aw Pathian, i kutah engkim ka hlan e. Kei, VANLalthlamuanpuia hian VanLal hi ka va thlamuanpui tak che em. Amein