Toying with Tourism department, Govt. of Mizoram.

Note: I chhiar hmain, he update hi thutak deuha chhiar loh tur. Nuih mai mai tur. Tin, pic ho khu click zel la a fiaha i en duh chuan. Mi pawi ka sawi anih chuan ngaihdam ka dil e.

Blog update a khat lutuk a, kumin ah ka la ti miahlo lehnghal a. Chuvangin blog update tur ka zawng a content ka nei thei si lo. Chu ka rilru hah ruk riau na chu tih tawpin a awm ta 😁

Eng dang a ni lo, Mizoram Tourism department in; Guitar perh tam ber World record siam an tumna chungchang ah logo design an huaihawt a. Zanin(21.10.2022) dar 6:45 bawr vel khan Logo design Lawmman dawngtu Pakhatna an rawn puang zar ta. Pakhatna hi 20,000 INR lawih a dawng dawn zui 🥱🥱

(Note: Design tu hi a hnua an thup leh tak si avangin ka tih lan sak ta lo)

Instagram ka lut chiah ka hmu chu, ka nuih kha a za lutuk tlat. A chhan engdang a ni lo; khawvel pum huap a record siam tur nisi logo-a Guitar lang kha a brand name a lang kuau a nih chu LOL! Kha Company khan an rawn sponsor pawh ni bawk silo khan a lang ve kuau lai kha 🤪😂

Mak ka ti lutuk a, tun hma atanga pawisawi website Lawrkhawm.com WhatsApp group-ah ka va sawi ta a. Sawi belh tur an lo hre hlawm ngei mai 😂 Kan thianpa pakhat *hmingthup chuan, "Chhui chiang rawh aw.. Chunglam ni lo chhunglam connection ṭha a pawimawh . 🤣," a rawn ti. Ka nuih kha a za ta viau mai a. An rawn chip zui ta zel sawi thui tur an ngah ta telh telh a. 

 A hnu deuhah chuan google thlalak an rawn dah a, logo ami ang pui pui an rawn dah chhuak ta sup sup mai. 

(Note: A hnuaia mi khu i click chuan image source a lo lang zel ang)

1. Logo-a Khawvel thlalak ang deuh hi kan thianpa pakhat chuan a rawn dah ta mai.

  2. Logo-a Guitar lem ang zet mai a rawn dah bawk Lol 

 3. Logo pian hmang, a ruangam din tu ber lah heta mi hi an rawn dah bawk.  

Kan zing ami lahin kha Guitar ang deuh kher a lo nei bawk 😂

A hit ka ti lutuk kha phone atangin ka collage ta mawp mawp a tihian ka siam chhuak a.

Group-ah bawk chuan ka va post leh ta a. Nimahsela, a hnu rei lo teah Logo an post chungchang kha Tourism dept in an lo delete ta vek mai a! FB ah ka va en leh, a lo bo bawk.

 Ka nuih kha a za angreng khawp mai a. Ka pic siam kha a lo viral thuai a, an hotuten an lo hmu ni ngei tur a ni.

Nimahsela, a hnu rei lutuk lo, zan dar 11 rik tep khan Twitter-ah logo chu a rawn lang leh ta tlat mai a. Group-ah bawk chuan kan va nui tlang leh.

Nimahsela, tun tum chu a design tu hming a bo ta tlat mai a, tin, Guitar brand lang kha an dah bo ta hmak mai a. Kan nuih kha a za telh telh a ni ber mai. 

(Design tu hming leh address a lang ta lova, Guitar brand name a bo ta 😁) 

 Engpawh nise, Tourism department emaw Sorkar emaw huat vanga ti ka(n) ni lova, public-a an dahchhuah tawh chu 'roast' a thiang e an tihna angah ngaiin kan chip zui ve mai a ni. 

He blog ka ziah dawn hian ka thiannu pakhat ka rawn a. Tihian (pic below) min chhang ta sia, ka rawn blog ta hluai a nih hi.

He event lo awm tur hi hlawhtling takin neih nise, Mizoram vul zel se tih hi ka duh dan a ni. Nimahsela, logo erawh ka beisei a pha lo tluan ta zak mai. Ka thianpa Baktea lah chuan PNG awmkhawm vawmbei te chu a thiam thu a lo ti ve sek bawk 🥱

Bonus pic: An hming ka thaichhe ve lo Public post a ni bawk a. 

Phewwww...What a night 👏👏😎

Ni hrilhhai - 18th June 2021

(Thlan kalpui hma in a tawp nan a taksa dai diai chu ka zu khawih leh hram kha a nia)

Lockdown avanga kan tukthuan ei hmanhmawh peihlo; zing dar 9 pelh a kan kil laiin - Ka Ni rawn kal in, "I Pa a damlo a, Damdawi inah an kalpui," tih thawm ka'n hre dawt kha zawng, chaw ei a tui zawm mawh khawp. Kha mi ni kha van kohna chhanga min liam san ni a lo ni ta.

Pa huaisen, zâm hmel pu ngailo, hmeltha leh palian, ngilneihna, zaidamna leh hmangaihna te hi a bik taka Pathian in a pek em ni tih ngai hial khawpa thuam a ni tlat. A nih bak bakin ka sawi em lovang chu maw. A ni tluka ngaihsan tur chuang hi ka neilo; discipline nei tha em em- engtik lai maha tlai ngailo, thil theihnghilh ngailo. A hmuna engkim dah a, a hun ah chat chat thil ti mi, mi in vawng fel, Pathian tih tlat a nihna kha a 'quality' a sang ka ti em em. 

Kha mi ni lungchhiatthlak zia leh runthlak zia te, a hrilhhaithlak zia hi sawifiah mai theih pawh a ni lo, a na vawng vawng anih hi maw. Thihna ah hian duhthlan tur tha zawk phei zawng a awm hauh lovang tih ka ring, a na em em vek ang tih pawh ka hrethiam mai. Nimahsela, a dam lai hmel hmu in, enkawl hman in, thuchah eng eng emaw tal te chu min han hrilh hman sela chu lung hi a dam vawng vawng tur hi a nia. Chutiang reng reng a ni silo. 

Patling an tap ngailo viau, an mittui far khat pawh hi na tak a ni an ti thin. Chuti anih chuan, a ruang chunga Patling kum 60 pel tawh si, a then putar tia sawi ngam aw rawl chhuaha an tap ka hriat khan mak hi ka va ti ngai em! A taka patling tap hi ka la hre ngai miahlo a, amak ngei mai. Mi min hmangaihna leh min ui puina ka chhiar seng lo.

Mamawh zawk te tan tia ram leh a sum leh pai a ui ngailo tih te a boral hnuah ka hre thar ve leh a, ka lawm lutuk hi ka lung a chhe em em mai nia. Duhamna in a tihbuai ve ngailoh a nihna khan a thinlungah Isua a dah lal hle tih hi ka ringhlel lo reng reng.

Chutiangin, kei a fapa eng ni bik miahlo min hmangaih zia hi ka hrechiang em em a, min duhsak zia hi ka hmu reng fo. Duhsak taka thil mi lei tum te pawh keima pualin ka la nei dawn khawp alawm🥰. A damchhung a reilo na a, a rei khawp ang - a chanchin kan sawi bang dawn tlat hleinem, a hringnun zinkawng tawite thawnthu a ziak mawi lutuk kha ka Pa mah nise ka va ngaisang tak em. RK Lianzuala, Upa K.L Biakchungnunga leh Pastor Lalhmingchhuanga Zongte te kha kum 60 tlin hmaa boral atan chuan ka ui vawng vawng. Chutiangin, ani pawh hi ka duh ai chuan a va kal hma em. Nimahsela, lawmna ho te anga lang min ti thlamuang tlat tu a awm, chu chu hei hi a ni - a damchhung zawng khan a thu awihin, a thinrimna tur leh a lungawihlohna tur engmah ka ti lui ngai lova, ka lakah a lawm thin a ni tih hriat aia nuam a awm chuang hleinem. Ka laka lungawilohna nei lovin min liam san ta vawng vawng kha tih tak takah chuan chhiat tawk mah ni ila min ti hlimtu a ni daih asin.

Kar hmasa khan a note bu ka en a, a phek tawp lamah, 'Nitin mahni inthunun' tih sermon tur a lo ziak chu niin, December ni 29 nikum a a ziah a ni. A thuziah ka chhiar a, thil ropui leh ril a ziak hran lo; Nitin mahni inthunun theih hi Pathian thu a ni mai tih kha a ziah tum chu a ni mai. Nimahsela, a nun pui tlat thil a nih avangin keimahah thu a sawi ring hle a. Mahni inthunun thei em em, ruihhlo, zuk leh hmuam in a tihbuai ngailoh, zing tho hmaa engkim a huna ti thin, ei leh in pawh insum thei em em a nihna khan ka thinlungah thu a va sawi ring em. Tun Sunday kal ta khan, Rev. RC-a Jongte titi na LIBERATION THEOLOGY chungchang ka ngaithla a, mi chanchhia leh vanduai, rethei te lam tang Pathian anih zia a sawifiah hle mai a, kei lungngai leh vanduai nia in hre deuh tlat lamah Pathian hi a tang tih ka hre thar leh a, a nuam ka ti viau mai. He thu ka ziah lai hian a thlan bulah khawhar takin ruah tla ser ser karah keimahin ka thu a, lung zawng a chhia in rilru a na thar duh mang e, mahse mittui zawng tla suh se, nakinah ka la tawk leh dawn alawm. 

Mi tamtakin sunna an sawi, an ziak, ka hmu, ka lawm vek. Chu'ng zingah chuan kan khuaa pa ropui ka tih leh ka ngaihsan Upa R.L Buatsaiha'n thlahna thu a ziah hi ka'n vawm bei ang e.

"Pu Awia, pa nun tlang leh mi biak nuam, kawng dung walk-a in-wish mai pawh kal paha min chhang ngai lova din chilh ṭhin, mi inngaitlawm leh zaidam, mi tin tana ṭhian duhawm leh zirtirtu ṭha, mi tam tak hnena thiamna leh finna petu, pa ngainatawm tak a ni. Mihring ze ṭha tinreng sawi ila, amahah hmuh tur a awm zel ang tih mai tur a ni.

Hetiang mi hawihhawm, "Lalpa chu ka hmaah ka awmtir fo va," ti ṭhin miin min her liamsan ta vung vung mai si a. A hmun ruak a zauvin a khawharthlak mang e.  

A thla muangin chawl mawlh teh se. Ziri te nufa ka tuarpui em em a ni."

Pu Buata hian dawt a sawi lo, a sawi lo tih hi ka chiang em em. Kha mi ni atang kha chuan thlanmual ka hmuh apiangin ka pa te veng anih hi ka ti ve thei ta. Ka thing phun ngei, Khuangthli hlim-ah tak ka pa chuan Thawhlehna ni nghakin a mutna min sawn san ta. Mi 'tak tak' thi chuan min nghawng riau mai a, miin ka hmel leh ka che zia ah hmu theilo mahse, chhungril erawh a rum a nih hi maw. Nimahsela, nakinah ropui takin kan la intawk leh ang, chu chu thlamuanna min pe tu a ni.

Ebenezer.

"I kissed him our last kiss, he smiled a bit. He swerved to his side, took a deep breath, and it's done. That's how the story ended,"

Says my Mom!

Breaks my heart. Ka mittui ka dang zo lo! Aw ka Nu aw ka nu!

— Muantea Chinzah (@MuanteaChinzah) June 19, 2021

Ka hmaah dawhkan i buatsaih thin - Rev Vanlalbela.

Nghakhlel taka ka lo thlir dauh dauh lehkhabu chu a ngaihnawm ka ti ngei mai. A chanchin tlangpui hi chu a thusawi ka ngaihthlak hnem tawh em avangin ka hre nual tawh. A chanchin hi hmanah RealLife Magazine(?) in an chhuah tawh a, a softcopy kha ka print out a ka chhiar nasa thin. A bo mai lohnan ka blog ah HETAH hian ka dah nghe nghe.

A aia chipchiar zawkin a ziak a, a ngaihnawm in a va hlu em.

Rambuai lai a a rammut dan chanchin atangin a tan a, CH Battalion Sipai chhuanawm zingah telin, Ramhnuai kohhran ah hial Upa a thlan a ni.

A chanchin a ngaihnawm ka tih leh min hneh ber lai chu, a tumruhna, a beih fan fan na leh Pathian a rin tlat na hi a ni.

Pawl 3 chiah pass in, a ngaihsan loh em em, a rammut laia a do thin, Vai ho tawng zirin thla 3 chhungin a thiam hman a. Pawl 3 chiah pass siin Pathian thu a zirchhuah dan chanchin hi a va pui em. G.Th, B.th, B.D a zir chhoh dan zawng zawng te, a kar-laka harsatna namenlo a tawh dan zawng zawng chhiar hian, thawnthu phuah thiam ten ngaihnawm thei ang ber tura an phuah te hi a ang ka ti hial a ni.

A tana tha te theihnghilh lova a chawimawi thiam em em te kha chhiar a nuam; Rev.Thangpuiliana, a rawngbawl ve theihnana a rawn ve fo thin pawh an thlalak dunna te a dah tel hial. Kumin March 20 khan Pastor Thangpuiliana a boral a, thlana tawngtaina hmang tu ngei kha Pu Bela hi a ni.

R.K Lianzuala khan, "Mizo zingah chuan Pawla ang teuh ber pawl a nih a rinawm hial a ni," a lo tih hial Pu Bela hi a nep lo hle. Hei hian a nihna a sawifiah teuh ber in ka ring. 

Hmuhsitna, hrehawmna leh tawrhna nasa tak ten a ngam zawh loh Zofaten Rev. Vanlalbela kan nei hi a lawmawm. A rin Pathian hi rin chakawm ngawih ngawih in a nun ah a lang fo mai, chu chu a zuar thiam em em bawk.

Sawi sen pawh a ni lo e, he lehkhabu hi ka keu nawn ka keu nawn tur lehkhabu a ni chiang mai. Chhiar ve theuh turin ka duhsak che u.

C.Bualhrânga nen darkâr 3.

C.Bualhrânga nen darkâr 3.

Kum 84 a upa ni tawh, Pukpui naupang rethei ve tak thin kha ani. MNF underground-a hruaitu lawk anih chhoh dan leh a tawn hriat chanchin min hrilh nasa mai a, ngaihnawm ka ti hle.

Pukpui khua aṭang hian a ni bakah Laldenga(President), H.Thangkima(Supply minister), Lalthangliana Philips(MNF Envoy to China) leh Lalhmingthanga(Foreign Minister, Mausen a piang ani na a, Pukpui a awm a zirna chhunzawm a inkawm ho vek anni) te an chhuak! Khaw te tak te atanga hruaitu lawk tak tak heti zat an chhuak hi a ropui dangdai hle.

Underground a zawm dan chanchin a ngaihnawm; ASSAM CIVIL SERVICE-ah a inziak tling a, chutih lai tak chuan MNF movement thawm awm tirh lai, President Laldenga leh Vice, Lalnunmawia te man annih thu Chanchinbu-a inziak a hmuh chuan a haw kawnga Silchar-a tlawh tumin, orange squash leh biscuit nen a 'Uncle' tia a sawi ngat, naupan lai ata tawha in hrechiang Laldenga te chu hmu turin Jail-a va kal ngat kha ani. Jail enkawltu in a lo hnar chu a rilru a na hle.

Aizawl-ah a haw chho, College lama a thiante lo ni thin; C.Lalkhawliana leh ṭhian ṭhenkhat ten MNF thuthlung an lo barh a,  a tui ta em em mai chu niin, Assam Civil Service-a interview pawh a thulh phah ṭhak! Assam Public Service Commision-a R.Thanhlira Chairman anih lai kha a ni zui. MNF thuthlung-ah khan a 'Uncle' zui a tum ruh hle.

February 28, '66 zanah Zalenna sual a nih dawn zanah erawh Pu Laldenga chuan ṭhulh mai a duh thu a sawi ta tlat mai. Kha'ng hunlai khan 'Morse Code' hmanga 'signal' thawn a ṭul; Aizawl - Reiek - Kawlhawk Tlâng - Lunglei tiin a in dawt a inhlan chhawn angai. Khami zan berkher khan Tlawng dung ah chhum a tam em avangin an thawn theilo. Thawn thei ngat se chu, 'Operation Jeriko' kha an ṭhulh ngei a rinawm hle, khatih lai kha chuan Pu Denga sawi kha 100-ah 100  an pawm em em hunlai a la ni ;) Pu Laldenga te khan 1969-ah Color TV an inchhawp tawh tih te a sawi :3

Pu Auva Chhakchhuak'n zawhna min paipawn lawk, 'Pu Nunmawia hova Chin Hills operation a thlawp leh thlawp loh' chungchang-ah pawh in ngaihtuah buai set set lovin, "A bak thlan tur dang kan neilo Chin hills kan beih mai loh ten," a ti hmiah.

Malsawma Colney(fam) pawh a kap siah siah mai a, Pu Colney-a kha la dam se hmaichhan ah han in ti kual vel se ka ngaithla chak hle. Kum 1970 a Mahmuam/Chhippui tlangdung an awm laia Zirna Sikul an din chungchang te sawiin; thla 2 vel chang chang bak an din hman lo. A lu ber aṭangin a rawn hmet mit kha a ni si a. 

Bualhranga Vice Chancellor anih chuan kei chu Chancellor tak kha ka ni mai tih kha Pu Colney-a sawi duh dan ani.

Pu Buala hian, "Malsawm Colney-a khan engah mah min tluk lo, Sap tawng lah a thiam tawk silo," tiin a sawi ve tlat bawk. "A class la te hi Thanghuta(M.P) kah nan bak a hmang tak tak lo, kei kha chu ka ti tak tak," a ti. Ṭhiandun inngam tlak ngang anni bawk a, a pui ṭhin hle in ka ring.

Thil tam tak a sawi a, han ziah chhuah ngam chiah loh lah ka nei deuh 😬 Dacca fall/Thil ri ret ret chungchang te, Lalnunmawia(Fam), Zoramthanga leh Lalthanhawla te a sawi dan chanchin lah a ngaihnawm dangdai✌🏼

A Autobiography hi a chhuak tep a, a ziak zo tawh, R.Lalrawna buaipui zawh rual rual a chhuak mai tawh tur ani. A bu hming tur hi, 'Khuarei Sulhnu' tih a ni dawn a. Thangthar te hian thudik tak an hriat hi a ṭul thu leh, a ziah nat  deuh thu te a sawi nual. A nghahhlelhawm zual na ber chu, "Ka lehkhabu hi chu a 'EXPLOSIVE' viau ang" a ti khan R.Zamawia ziah, 'Zofate zinkawng ah zalenna mei a mit tur a ni lo' kha a rawn phak ang em tih chu min ti chhiar chak tawh tu ber ani.

Mizo zinga B.Com(hons) hmasa ber, Lianchhungi Book Store neitu Pu Buala hi nidanga kawm leh atan kham lo takin kan in ṭin san ta ani.